Geastrum minimum е сапроб и се развива во добро-развиена и стара шума од дива фоја на островот Голем Град, каде овие дрвја ја формираат заедницата Pruno webbii-Juniperetum excelsae. Видот од ова наоѓалиште е најверојатно изчезнат бидејќи е најден само еднаш, во 1997, а оттогаш и покрај бројните посети на островот Голем Град, не е забележан повторно. Овој вид кај нас е најден и по течението на р. Пчиња во дабово-габерова шума, во чија близина се наоѓа добро развиена заедница на дива фоја, а исто така и во борово-дабова и мешана шума, поради што џуџестата ѕвездичка може да се очекува и на други локалитети, со дива фоја и/или даб.