Видот Astragalus physocalyx има регистрирана единствена популација на една локација во Северна Македонија. Живеалиштето на видот се наоѓа во многу чувствително подрачје, каде се присутни различни шумарски, градежни и други антропогени активности:

• Во близина на локалитетот каде е регистрирана популацијата на видот е изграден цевковод за водоснабдување од Ѓавато до Дојранското Езеро.

• Гасоводот поминува многу близу, но за среќа популацијата не е оштетена.

• На Чурчулум, над локацијата каде опстанува популацијата, изградени се ветерници.

• Подножјето на локалитетот Чурчулум е пошумено со алохтоните видови, Pinus halepensis и Cupressus sempervirens.

Поширокото опкружување на Богданци, вклучувајќи го и местото Чурчулум, е подложно на пожари.

За бројот на зрели единки нема доволно податоци од минатото за да се процени постојаното намалување.

Според процената на Црвената листа на IUCN, видот спаѓа во категоријата Загрозен.

Некои видови од родот Astragalus имаат традиционална употреба за производство на природна гума за џвакање тракакант, додека други видови се користат како лековити билки (Abtahietal., 2015). Сепак, нема податоци за употреба на Astragalus physocalyx за медицински или индустриски цели во Северна Македонија.

Овој вид е дел од Листа 1 – строго заштитени диви видови во Република Македонија (Службен весник, Република Македонија, бр. 139, 7.10. 2011). Вклучен е и во Прилог 1 од Бернската конвенција (1979).

На националните власти или локалната самоуправа треба да им се предложи да иницираат предлог за прогласување на оваа локација како споменик на природата или да се прогласи видот Astragalus physocalyx за природна реткост.