Rubroboletus demonensis е термофилен вид што се среќава во топли и влажни листопадни шуми од даб, бука и питом костен на силикатна почва. Во Северна Македонија е редок вид, присутен само на две наоѓалишта на планините Герман и Пелистер, на надморска височина од околу 1.300 m. Видовите вргањи од оваа група се многу ретки во земјава. Ако се земат во обѕир и претпоставените локалитети, се проценува големина на популацијата од најмногу 400 зрели единки, со само неколку единки во рамки на секоја субпопулација. Видот е главно загрозен од загуба и уништување на природното живеалиште како резултат на шумска сеча и создавање голи површини, сепак потребни се дополнителни податоци со цел прецизно да се процени трендот на популацијата. Видот е категоризиран како ранлив согласно критериумот D1.

Најверојатно видот е отровен. Не е предмет на трговија.

Во однос на потребните мерки за зачувување на видот, неопходно е веќе познатите наоѓалишта да се зачуваат и строго да се заштитат од користење на ектомикоризниот партнер или од пренамена на земјиштето. Поради начинот на управување со дабовите и буковите шуми, за да се одржи солиден квалитет на живеалиштата во земјава, од суштинско значење е да се назначат дабови шумски резервати за заштита и клучни шумски биотопи. Наместо чиста сеча, на локацијата каде се сече шума треба да се оставаат дрвја со различна старост за да се осигура опстанок на погодни живеалишта. Не треба да се врши пошумување со инвазивни видови дрвја.

Во однос на потребните истражувања, неопходно е да се врши редовно годишно мониторирање на утврдените локалитети, заедно со теренски истражувања на потенцијалните локалитети за да се проучи распространетоста и динамиката на создавање плодни тела на Rubroboletus demonensis. Пописите на шумите и шумарските планови е препорачливо да се дигитализираат и редовно да се ажурираат. Неопходна е изработка на карта на живеалишта во земјава, како и креирање соодветна политика на управување со шумите чија цел ќе биде одржување соодветно живеалиште за овој вид.