Phylloporus pelletieri  е редок вид, со доста фрагментирани и изолирани популации. Досега се евидентирани само неколку единки на два локалитета. Ако се земе предвид дека буковите шуми кај нас заземаат најголем дел од вкупната површина под шуми, а за овој вид има само два локалитета (од кои на едниот не е повторно најден), се предлага во категоријата на ранливи видови. Главна закана претставува сечата во стари букови шуми. Видот е во потесниот избор за вклучување во Анекс 1 од Бернската конвенција, од страна на Европскиот совет за зачувување на габите (ECCF), и се наоѓа на црвените листи на 12 европски земји. Според Црвената листа на загрозени видови на IUCN, видот е оценет како најмалку засегнат (LC).

Видот Phylloporus pelletieri се јаде, но не се собира за употреба во човековата исхрана.

Видот може да се заштити преку спречување деградација на шумите како и преку нивно зачувување. Тука спаѓа избегнување интензивна практика на шумска сеча во шумите и насадите како и во околните подрачја.

Се препорачува активно спречување шумска сукцесија и ерозија, како и определување клучни локации за заштита.

Заштита на живеалиштата со закон, особено на старите природни широколисни шуми; правилно управување со шумите и регулирање на влијанието од рекреативни активности доколку не е можно да се изврши заштита на локалитетите.

Ова е една од првите видови габи предложени за заштита уште во 2003 година, како дел од Анекс I на Бернската Конвенција (Dahlberg & Croneborg 2003). Како резултат на тоа беше и дополнувањето на Црвената листа на габи на Р. Македонија (Karadelev, Rusevska 2013), во категоријата на ‘близу засегнати’ видови (NT). Сега видот е дел од Глобалната иницијатива за црвена листа на габи, оценет како близу засегнат NT (http://iucn.ekoo.se/iucn/species_view/183177/).