Popullata e vetme e kësaj specie në vend ndodhet në një lokalitet të vetëm dhe Zona e saj e okupimit (ZeO) dhe shtrirja e ndodhjes (SheN) janë shumë të vogla. Ndërtimet e infrastrukturës (restorant, urë që lidh ishullin dhe tokën, shtigjet, etj) janë kërcënime për zvogëlimin e zonës dhe cilësinë e habitatit. Vetëm 170 individë të maturuar ekzistojnë, por nuk ka të dhëna të mjaftueshme nga e kaluara për të vlerësuar rënie të vazhdueshme.

Sipas Vlerësimit të Listës së Kuqe të IUCN të BE-së, kjo specie është MDh.

Familja Apiaceae, e cila përfshin llojin angjelika, paraqet një nga familjet bimore me përqindje më të lartë të bimëve mjekësore. Disa specie të llojit angjelika njihen si bimë mjekësore, por përdorimi i specieve Angelica palustris për qëllime mjekësore nuk është i njohur. Mirëpo, shpërndarja e kufizuar e saj në territorin e Maqedonisë së Veriut dhe popullata e pakët e kësaj specie, nuk paraqet interes të veçantë nga ai aspekt.

Vendndodhja ku rritet kjo specie ndodhet brenda kufijve të PK Galiçicës dhe në vijën e bregut të Liqenit të Ohrit, e cila është pjesë e listës së UNESCO-s si trashëgimi natyrore.
Specia duhet të ketë status të veçantë të mbrojtjes, duke pasur parasysh që ky lokalitet është qendër turistike me dukshmëri të madhe veçanërisht në verë dhe vjeshtë, kur bima ka periudhën optimale vegjetative dhe riprodhuese të zhvillimit. Duhet të merret në konsideratë në Planet Hapësinore të PK Galiçica.

Për shkak të statusit të saj, si e mbrojtur në mbarë Evropën, kjo bimë është përfshirë në Konventën e Bernit dhe më pas është vendosur në Aneksin II të BE, Direktivës për Florën-Faunën — Natura 2000.